පොඩ්ඩිත්, චුට්ටිත් සල්සා නැටුමක

 

 

පොඩ්ඩිට සල්සා නටන්න ආසාවක් මුලින්ම ආවේ අරුනිගේ පෝස්ට් එකක් දැක්කට පස්සේ. මොනදේ ගැන උනත් කලින් දැන ගන ඉන්න එක ඇඟට හොඳයි කියලා හිතුන හන්දා පොඩ්ඩි ගියා චුට්ටිව මුන ගැහෙන්න  එයාලගේ සුපුරුදු කෝපි කඩේට.  චුට්ටි මේ ලඟදි ඉඳන් නැටුම් පංති යනවා. චුට්ටිත් ලස්සන කෙල්ල. අත්තම්මාගේ පරම්පරාවේ ජාන ගිහින් තියන විත්තිය බැලූ බැල්මට පේනවා. දැක්ක හැටියේ බර වැඩිවෙන ජාතියේ කේක් කෑල්ලක් කමිනුයි එයා හිටියේ. ලඟ මේසේක හිටපු උත්තම පුරුෂයෝ දෙන්නෙක් චුට්ටි දිහා බලාගන (කේක් කෑල්ලටද දන්නෙත් නෑ. පව්…) එයාලගේ සුපුරුදු පැනි හැලීම කරමින් උන්නා.

'හා, හා, මගේ කේක් කෑල්ලට අත තියනවා එහෙම නෙමේ. ඕනම නම් තව කේක් කෑල්ලක් ගෙන්න ගමු' පොඩ්ඩිගේ අතට ගහන ගමන් එයා කතා කලා. 'දැන් මොකද මේ හදිසියේ සල්සා නටන්න හිතුනේ' එයා කතා කරන්නේ හරියට මෑතදී විභාගේ පාස් කරපු ලෝයර් කෙනෙක් වගේ.

පොඩ්ඩි කට ඇරියා විතරයි. 'මම දන්නවා. මම දන්නවා. ඒකෙන් කමක් නෑ' එයා කීවා. 'දැන් මොනවද දැන ගන්න ඕනි'.  'සල්සා නටන හැටි' පොඩ්ඩි කීවේ අහිංසක විදියට. 'එතනට හැන්ඩි කොල්ලොත් එනවද?'

චුට්ටිගේ සීනු හිනාවට, පැනි පෙරපු කට්ටියටත් හිනා. හරියට ලෝකේ තියන හොඳම විහිලුව ඇහුවා වගේ. 'කියලා වැඩක් නෑ. වැඩිපුර එන්නේ නාකි අංකල්ලා. හැන්ඩියෝ බලන්ට ඕනි නම් හවස 8.30 න් පස්සේ තියන one hour social එකට යන්න ඕනේ.’ පොඩ්ඩි එයාට කියලා ගෙන්න ගත්තු කේක් කෑල්ල කන ගමන් චුට්ටි තවත් මොනවදෝ කියනවා ඇහුනා.  පොඩ්ඩිට ඉතින් කන සිහියට වඩා තව සිහියක් තියන එකක්යැ.

යන්තමට ඇහුනේ මෙන්න මේ  වගේ වචන..” Beginner’s free classes, Latin American, Ball-room dancing, intermediate, progressive, new vogue dancing,   dancing shoes, හරි කුකුළා.” එතකොට නම් පොඩ්ඩි ඔලුව උස්සලා බැලුවා. 'හරි කුකුළා' කියලත් සල්සා තියනවද? අන්තිමට ඔන්න ඊලඟ සෙනසුරාදා දෙන්නා හම්බවෙන්න කතා කරගත්තා පන්තිය ලඟදි.

පොඩ්ඩි නං එදා ඇඳගන ගියේ ට්‍රැක් පෑන්ට්ස්. නටන්න ලේසිවෙයි කියලා හිතුන හොඳ දුවන්ට අඳින  සපත්තු දෙකකුත් දාගන. එතන හිටපු අය දැක්කාම පොඩ්ඩිට හිතුනේ ආපහු ගෙදර දුවන්ට. හරියට මඟුල් ගෙවල්වල යන්ට වගේ තමා එයාලා ඇඳලා හිටියේ. චුට්ටිත් ඉන්නවා කොට ගවුමක් කාරිය දාගන. පොඩ්ඩි දැක්ක හැටියේ එයා ඔලුවේ අතගහගත්තා. 'මට අමතක උනානේ. හරි කමක් නෑ' ඔන්න පන්තිය භාර සර්කාරයටත් (අවුරුදු හතලිස් ගානක තරුනයෙක්) පොඩ්ඩිව අඳුන්නලා දුන්නා.. අප්පේ එයාට තිබුනු සතුට හරියට කාලෙකින් පවුලේ කෙනෙක්  හම්බ උනාවගේ. අත මිරිකපු මිරිකිල්ලට පොඩ්ඩිට හිතුනේ ඉස්පිරිතාලේත් යන්ටවෙයි කියලමයි. සර් පොඩ්ඩිගේ පාට්නර් වෙන්ට කැමැත්තෙන් ඉදිරිපත් උනා. එයා තාම දැනගෙන හිටියේ නෑ පොඩ්ඩිට කොච්චර හොඳට කකුල් පාගන්ට පුලුවන්ද කියලා.

ඔන්න ඉතින් සංගීතෙත් පටන් ගත්තා. ඌහ්...කට්ටිය ඇඹරෙනවා. අර මොනවද ඕනි උනාම පොඩි එවුන් දඟලන්නැහැ දඟලනවා. ඉස්සරහට පස්සට බොහොම ලාලිත්‍යයෙන් යනවා. හිටපු ගමන් පිරිමියා ගෑනුකෙනාව බිමට දාන්ට හදනවා වගේ පේනවා.පොඩ්ඩිට හිතුනේ සමහර ගෑනු ලමයින්ගේ කකුල් ගැලවිලා යයි කියලයි, මෙහෙම නැටුවොත්.  හරියට අවුස්සපු කඩි රෑනක් වගේ. එක යුද්ධයයි. අනේ පොඩ්ඩි නම් හැරෙන හැරෙන පාරට වැටෙන්ට යනවා. අර අහිංසක මනුස්සයාගේ කකුල් එදා රෑ ඉදිමෙන්ටත් ඇති පාගපු පෑගිල්ලට. සර්කාරයාගේ පොඩ්ඩි අල්ලගනමයි හිටියේ. නැත්නම් වැටිලා එක ජරමරයයි. සංගීතය ඉවර උනාම මිනිහා හොඳ හුස්මක් හෙලුවා. ඒ උනාට පොඩ්ඩිගේ පිටට තට්ටු කරලා එයා කීවේ පොඩ්ඩිට හොඳට නටන්ට පුලුවන් බවයි. අපොයි සල්සා මෙහෙම නම් අර බූරාගේ එක තැන කකුල් නවන නැටුම කොහොමට ඇද්ද? පොඩ්ඩිට හිතුනා.

ඔන්න ඊලඟට බෝල්-රූම් ඩාන්ස් මියුසික් එකක් පටන්ගත්තේ සර්කාරයා පොඩ්ඩිගේ සල්සාවලට බයවෙලාද දන්නෙත් නෑ.. පොඩ්ඩිව අල්ලගත්තේ වයස 60 ක විතර අංකල් කෙනෙක්. අනේ එයා නම් හිනා උනු ගමන්මයි. පොඩ්ඩිව අල්ලගෙන හිටියේ ආය අත අරින්න නම් නෙමේ වගේ.. චුට්ටි ගේ පාට්නර් නම් ලස්සන කොල්ලෙක්. හරියට එඩ්වර්ඩ් කලන් වගේ. පොඩ්ඩිට ඊරිසියාවේ බෑ. චුට්ටි එයා දිහා බලලා කින්ඩි (තේරුම අහගන්ට බැරි උනා) හිනාවක් දැම්මා. පොඩ්ඩිට් නටාගන යන ගමන් එයාලා පැත්තටමයි ඇදුනේ කතා කරන්නේ මොනාද කියලා අහගන්ටත් එක්ක. වයසක අංකල් එයාව වෙන පැත්තකට ගෙනියන්ට හදනවා. මෙයා යන්නෙම එඩ්වර්ඩ් කලන් පස්සේ. හිටපු ගමන් අංකල් නගුට පෑගුන බලු පැටියෙක් වගේ 'කීං කීං' ගෑවා.

'ඔයා හරි ලස්සනයි' එඩ්වඩ්, චූට්ටිට කියනවා පොඩ්ඩිට ඇහුනා. 'ඉතින් ඒකද ඔයා ඔය හිනාවෙන්නේ?' ඒ චූට්ටි. මල ජුලියයි අත්තම්මා අපේ පරම්පරාවේ ගෑනු ලමයින්ට හරියට මායම් හැට හතර උගන්නලා නැති හැටි. පොඩ්ඩි හිතුවේ එහෙම හැසිරෙන්නේ පොඩ්ඩි විතරක් කියලයි. 'නෑ ඔයා ඒ ගැන දන්නේ නෑ ඒකයි මට හිනාගියේ' කලන් කීවා. චුට්ටි බැස්සියක් වගේ ඇස් ගැහුවා. එයාට ඒක තේරුනේ නෑ.

'මම එඩ්වර්ඩ් කලන් වගේද?' අර මෝඩයා ආයම අහනවා. පොඩි නිහඬතාවක්. පොඩ්ඩිගේ හාර්ට් එක 'ගිඩි...ගිඩි' ගෑවා. 'හ්ම්...ඒවගේ තමයි'  ඔන්න පොඩ්ඩිට හුස්ම වැටුනා. 'එයාටත් නහයක්, කටක්, ඇස් තියනවා. ඔයාටත් තියනවා' චුට්ටි කියන්නේ ඇසුත් කරකව, කව. උප්ස්..අංකල් 'ඌයි' කීවා. පොඩ්ඩි දැම්මා අර ලස්සන හිනාව 'සොරී' 'ඉට්ස් ඕකේ මයි ඩාර්ලින් ගර්ල්..." අංකලුත් මාර හිනාවක් දාලා කියනවා.

'ඒ උනාට දකින හැම ගෑනු ලමයම කියන්නේ එහෙමයි'. සුද්දා උනාට මෝඩකමට බෙහෙත් නෑලුනේ. ඇත්තටම එයා ටිකක් ඒ වගේ තමයි. ඇඟේ ලේ කලඳක් නෑ වගේ සුදු පාට. තොලුත් රතු පාටයි. හැබෑට වැම්පයර් කෙනෙක්ද දන්නෙත් නෑ.

එයා දිහා බලන් යන ගමන් තමන් කොහෙද යන්නෙ කියලා පොඩ්ඩි බලන් හිටියේ නෑ. 'දඩන් බිඩින් ඩොන්' කියලා ගිහින් දොරක හැප්පෙනකල්. බලනකොට අංකල්ගේ නලලේ ලොකු ගෙඩියකුත් ඇවිත්. අනේ ඒත් හිනාවෙනවා. මේ පිරිමින්ට උම්මා සීයක් දුන්නත් වටිනවනේ පොඩ්ඩි හිතුවා.

මෙන්න අන්තිමට සර් දුන්න ලෙක්චර් එක.

' සල්සා වගේ නෙමේ බෝල් රූම් . බෝල් රූම් ඩාන්සින් වලදි ගයිඩ් කරන්න ඕනි එක්කෙනෙක්. බොහෝ වෙලාවට පිරිමියා තමයි ඒක කරන්ට ඕනේ. එතකොට එයාගේ පාට්නර්ට එයාව ෆලෝ කරන්න ලේසී. වැඩිය නටන්ට බැරි උනත් ප්‍රශ්නයක් නෑ. අවශ්‍ය තැන්වලදි චූටි පුෂ් එකක් දුන්නම හරි. එතකොට නැටීම පහසුයි. ඕනවට වඩා පුෂ් කරන්නත් නරකයි. තමන් දන්නවා කියලා හිතාගන අනෙක් කෙනාව ගයිඩ් කරන්නත් නරකයි. දෙන්නාගේ තේරුම් ගැනීම උඩ තමයි ඒක සිද්ධ වෙන්න ඕනේ. එතකොට තමයි හොඳ නැටුමක් ඉදිරිපත් කරන්ට පුලුවන් වෙන්නේ.’

පොඩ්ඩිට මොහොතකට හිතුනේ සර් කතා කරන්නේ විවාහය ගැන කියලා. විවාහයට අදාල කරලා බැලුවොත් ඒක සත්‍ය නේද?

හැබැයි එදායින් පස්සේ පොඩ්ඩි නැටුම්වලට ගියේ නෑ

 

“We're fools whether we dance or not, so we might as well dance.”  

~Japanese Proverb~