පති කුලයට

'රං බංඩා මාමේ! අපි ගිහින් එන්නම්' බුලත් කහට බැඳුනු රං බංඩා මාමාගේ දත් වහල්ල එලියෙට පනීදෝ කියලා පොඩ්ඩිට හිතුනේ ඒ හිනාව දැක්කාමයි.

'ඔයා මොකද ඒ මනුස්සයට එහෙම කීවේ' ඔහු ඇසුවේ නොරිස්සුම හඬකින්.

'ඇයි අද අපි දවසම මෙතනද ඉන්නේ? මෙලහකට ඔයාගේ අම්මට තරහා ගිහිල්ලත් ඇති'

'හුහ් ඔය සමහරුන්ට වගේ අපේ අම්මට තරහා යන්නේ නෑ'

කාරය යලිත් ඉබි ගමනින් ඇදෙන්ට පටන් ගත්තා.

'මේ පාරට අන්තිමට තාර දැම්මේ කවදද?' පොඩ්ඩි ඉස්සි, ඉස්සි පාර දිහා බැලුවේ පාර දිහා.

'මම දන්නේ කොහොමද?'

ගේ තිබුනු කඳු ගැට්ටට කාරෙක ගන්න කොට යට වැදිලා ආව සද්දෙට පොඩ්ඩිගේ හදවතත් මොහොතකට නතර උනා වගේ උනා. දෑවැද්දට අප්පච්චි දුන්නු අලුතම කාරෙක. මුන්දැට ගානක්වත් නෑ.

පුංචි කොක්කු පැටව් වගේ කෙලි පොඩිත්තියෝ ටිකක් ගේ ඉස්සරහ හිටගෙන මොනවද කියනවා.

'ඒ ජයමංගල ගාථාද?' පොඩ්ඩි ඇහුවේ රහසින්.

'ෂ්....ඒ අම්මලාගේ ඉස්කෝලේ ලමයි. සිංදුවක් කියන්නේ'

 

අම්මා පොඩ්ඩි අතට මලක් දැම්ම වතුර වීදුරුවක් දුන්නා. පොඩ්ඩි ඒක බීගෙන, බීගෙන ගියා. වෙලාවට. වතුර තිබහේ හිටියේ. වටා පිටාවේ හිටපු උදවිය මූනෙන්, මූන බලාගත්තා. 'හා... හා... යං ගෙට' අම්මා කීවා.

'දණ ගහල අම්මට වඳින්ට' ඔහු මිමිණුවා. මේ කෙහෙල්මල් ඇඳුමත් එක්ක දණ ගහන්නේ කොහොමද? පොඩ්ඩි නුහුරුවට නැමිලා වැන්දා.

අම්මෝ කෑම මේසේ දිග. ඒක වටේ හිටපු උදවිය නම් හිටියේ කන්ට වගේ පොඩ්ඩි දිහා බලාගෙන. කෑම ගොඩයි. කතා මහ ගොඩයි.

කවුද මාමා කෙනෙක් මෙහෙම කියනවා.

'පතිනියක් කියන්නේ, තමන්ගේ ස්වාමි පුරුෂයා ආදරෙන් රැක බලාගන්න කෙනෙක්. එයාගේ සැප දුක් බලන කෙනෙක්. එයාගේ කෑම, බීමද, ලෙඩට දුකටද, ....' කතාව අහගෙන ඉන්න ඔහුගේ මුවේ නැගෙන මදහස පොඩ්ඩි දැක්කා. සපත්තුවේ උස අඩිය කොහොම එයාගේ කකුල හොයාගත්තාද දන්නේ නෑ. 'ඌහ්' ඔහු කීවා. පෝරුව උඩ අර නිළමේ සූට් ගහගෙන ඉන්නකොට මෙයා හිටියේ මෝල් ගහක් ගිල්ලා වගේ. කිසි හිනාවක් තිබුනේ නෑ මූනේ ඒ වෙලාවේ.

මාමා තාම කතා කරනවා. පොඩ්ඩි උඩ බැලුවා. තද සුළි, සුළඟක් ආවොත් ටෙන්ට් එකත් එක්ක ඔක්කොම ගහගෙන යයිද? නෑ හය්ය ඇති. පොඩ්ඩි හිතුවා.

'දුවට මහන්සිද?' අම්මා අහනවා.

'නෑ නෑ. අපි කාරෙකේනේ ආවේ' ඔහු කියනවා.

ආයම සපත්තුව ඉස්සෙන්ට හැදුවත් පොඩ්ඩි බලෙන් වගේ ඒක බිමට තියලා තද කරගත්තා.

යාන්තම් ඔක්කොම ඉවරවෙනකොට කලුවර වැටෙන්ටත් ලඟයි.

පොඩ්ඩිලාට ඉන්ට ලැබුනේ ඔහු ඉස්සර ඉඳන් හිටපු ඉස්තෝප්පු කාමරේ. ඇඳ දැක්ක හැටියේ පොඩ්ඩිගේ ඇස් උඩ ගියා.

'මේක ඩබල්ද? සින්ගල්ද?'

'ඔක ඩබලුත් නෙමේ. සින්ගලුත් නෙමේ. මේ ගමේ මාමා කෙනෙක් හැදුවේ'

'හපොයි' පොඩ්ඩි තමාටම කියාගත්තා.

'අපි ළිඳට ගිහිං වොශ් එකක් දාගෙන එමු'

'ළිඳට?' 'ඔව්. ඔව්. අතින් වතුර ගන්න ලිඳක් පහල තියනවා...' ඉතින් ගල්, මුල් පෙරලගෙන, ඔහුගේ අතේ එල්ලීගන පොඩ්ඩි ලිඳට ගියා. 'අනේ මෙතන ඇඳුම් මාරු කරන්නේ කොහොමද? සබන් ටිකක්වත් ගාගන්නේ කොහොමද? ' පොඩ්ඩිට ඇඬෙන්ටත් ආවා.

ගෙදර යමින් හිටපු සිරියාවතී, ඒක දැකලා පොඩ්ඩිට නාගන්ටම උදව් කලා. පොඩ්ඩි ගෙදර ගියා එයත් එක්කම. අම්මා කිරි වීදුරු දෙකක් කාමරේට ගෙනාවා. 'දුව, පුතාට කියන්ට දොරවල් ලොක් කරලා නිදාගන්ට කියලා'

'හොඳයි අම්මා...'

ඔන්න යාන්තම් ඔහු ආවා. එක හුස්මට කිරි වීදුරුව තනියම බීලා දැම්මා. මාර රොමැන්ටික් කෙනෙක්.

'කෝ පොඩ්ඩක් එහාට වෙන්ට' පොඩ්ඩි ටිකක් එහාට උනා.

ඔහු ඉතින් පොඩ්ඩිගේ කර වටේ අත දාලා පොඩ්ඩිව තුරුල් කරගත්තා. 'හරි සුවඳයි. ඔන්න  උම්ම්ම්මා දෙනවා' ඔහු පොඩ්ඩිගේ ඔලුවට උම්ම්මා දුන්නා. පොඩ්ඩි හිනා උනා. 'මේ ඒක නෙමේ' 'ඔව්' පොඩ්ඩි කීවා.

'කවුද අර හිටපු මහත එක්කෙනා. අර කතාවක් එහෙම කලේ'

'ආහ් ඒ මාමා කෙනෙක්'

'එතකොට අර හීනි උස, සුදු එක්කෙනා '

'ඒ යාලු මාමා කෙනෙක්'

'අම්මා හරියට ඇඬුවා නේද?' 'හ්ම්'

'අත්තම්මත් ඇඬුවා නේද?' 'හ්ම්'

'අප්පච්චි නම් ඇඬුවේ නෑනේද?' 'හ්ම්'

'ඔයා අඬපු තරම්. මම හිතුවේ ඔයා මා එක්ක එන්නෙත් නැතිවෙයි කියලා'  (පොඩ්ඩි වැඩිය ඇඬුවේ නෑ මේකප් හේදිලා යයි කියලා බයෙන්. ඒතකොට පින්තූරු කැත වෙනවනේ).

දඩාස්....!!!

පොඩ්ඩි නැමිලා, ගෙම්බා වගේ බිම වැටිලා ඉන්න ඔහු දිහා බැලුවා.

'ඕහ්...සොරි. ඔයා බිම වැටුනද?'

'කමක් නෑ. කමක් නෑ. ' ඔහු ආපහු ඇඳට නැග්ගා.

'ඉතින් කියන්ටකෝ අර අරයා කවුද? වෙඩිම හොඳට තිබුනා නේද? ආපු ගනන හොඳටම ඇති නේද? කෑම රසයි නේද? හෝටලෙත් මාර ලස්සනයි නේද?'

පොඩ්ඩිට ඔහුගේ කටහඬ ඇහුනේ ඈතින් වගේ. ඒක ක්‍රමයෙන් නැතිවෙලා යනවා පොඩ්ඩිට දැනුනෙත් නෑ. පොඩ්ඩි හීනෙන් හිනාවෙන ගමන් දිගටම නිදාගත්තා.

 

(පිදුම: ලඟදීම පති කුලයට යාම සඳහා ඇඟිලි ගනින චුට්ටිට) 

 

 

A honeymoon is a short period of doting between dating and debating.