රජෙකුගේ ශාපය

කාලය: 1332 BC- 1323 BC

දේශය: ඊජීප්තුව

විලක්කුවලින් ආලෝකවී තිබූ, අඳුරු බරාඳය මැදින් ඇය යහන් ගැබට දිවගියේ අඳුරින් මතු උනු සෙවනැල්ලක් වගේ. ඇගේ සුදු, දිගු ගවොම දෙපසවූ උස් කවුලුවලින් හමා ආ සුලඟින්, බිත්ති මත තවත් සෙවණැලි මවා පෙන්වූවා...ඈ සිතූ අන්දමට යහන් ගැබේ දොර බාගෙට විවරව තිබුනා. ඈ එය විවර කලේ ගැහෙන හදවතින්.

ඇගේ දෑස් දිවගියේ යහන අසල බිම වැටී සිටි ඔහුගේ සිරුර වෙත. වේදනාවකින් පිරී තිබූ ඔහුගේ මුව මෙතරම් නිසල කුමක් නිසාද? ඔහුගෙන්  කිසිදු හඬක්, සිහින් කෙඳිරිල්ලක්වත්.....පිට නොවන්නේ මන්ද? ඔහුගේ හිස පිටුපසින් ගලා ආ සිහින් ලේ ධාරාව බිම අතුරා තිබූ පලස තෙත් කරමින් ගලා යනු ඈ දුටුවේ එවිටයි. ඈ නැගූ හඬට ඔහුගේ විශ්වාසවන්ත සේවකයින් දෙදෙනා වහා දුව ආවා.

ඇය ඔහුගේ ප්‍රාණය නිරුද්ධ සිරුරෙහි හිස තම උකුල මත තබා ගන්නා අන්දම ඔවුන් බලා උන්නේ කම්පාවෙන්.

නියමිත කාලයට කලින් ඈ මෙලොවට බිහි කල, ඔවුන්ගේ උපන් ගෙහි මියගිය සිඟිති, දියණියන් දෙදෙනාගේ තරුණ පියා, ළදරු රජු ලෙස රටවැසියන් හඳුන් වනු ලැබු ඒ ප්‍රේමණීය කුමරා, ඇගේ දෑසින් ගලා ආ කඳුලු වැල්වලින්  ඔහුගේ ආදරණීය මුහුණ තෙත් වූවා.

'දියණිය' ඔවුන්ගේ පූජකවරයා ඈ අමතන තුරු ඇය ඔහු වෙතින් නෙත් ඉවතට ගත්තේ නෑ.

'ඔබ මෙහි ඉඳීම භයානකයි. සේවකයන් සමග වහාම උමගෙන් දේවාලය වෙත යන්න. එහි ඔබට අවශ්‍ය ආරක්ෂාව සැපයෙනු ඇති'

ඔවුන් ඈ වෙතින් ඒ සිරුරු ඔසවාගනු ඈ බලා හිටියා. අඳුරු උමග තුලින් එලියක්ද රහිතව ඈ කෙසේ ගමන් කලා දැයි ඇයට මතකයක් තිබුනේ නෑ. ඔහුගේ නිසල දේහය ඈ සමගම සේවකයින් ගෙන ගිය පමණයි ඇයට මතක.

'සතුරා කොයි වෙලාවක් හෝ එනවා දියණිය ... ඔබ ඔහුගෙන් ආරක්ෂා විය යුතුයි.' පූජකවරයාගේ කියන්නේ කුමක්දැයි ඇයහට හරිහැටි අවබෝධවූයේ නෑ.

හදිසියේ කැඳවනු ලැබූ රාජකීය වෛද්‍යවරයා, ඔහුගේ දේහය බෙහෙත් ඔරුවක් ගිල්වනු, ඈ මිදුනු හදකින් බලා හිටියා. එම සිරුරුම පටියෙන් එතෙනු, ඔහුගේ දේහය රන් දෙනක තැන්පත් වෙනුත් ඈ බලා හිටියා. අඳුර ගෙවී, එලිය වැටෙන බව ඇයට වැටහුනේ නෑ. ඔවුන් ඔහු තැන්පත් කලේ තාවකාලික සොහොන් ගැබක. එහිවූ තම දියණියන් බහා තිබූ දෙන දුටු ඇගේ හදවත යලි දියවීමට පටන් ගනු ඇයට දැනුනා.

 ඔහු ඉතා අහිංසක පුද්ගලයෙක්. රජෙකු වුවත් දුක් විඳි තැනැත්තෙක්. කුඩා කල සිට නිතර හටගත් උණකින් පෙලුනු අයෙක්. විකෘති පාදයකින් පීඩාවට පත් වූවෙක්.  කිසිවෙකුට කරදර නොකල ඔහුට මෙසේ කලේ ඇයි? එවන් අයෙකුට මෙවැන්නක් කල ඔවුන්හට ඈ ශාප කලා. ඔහුගේ සොහොන් ගැබට කිසිවකු අත තැබුවහොත් ඔවුන් මියා යායුතු බවට ඈ දෙවියන්ගෙන් ඉල්ලා හිටියා. ඔවුන්හට ශාප විය යුතු බව අයැද සිටියා.

'පාරාවන්ගේ නින්දට බාධා කරන්නවුන්හට මරණය පැමිනෙණු ඇත. '

ඔහුගේ සොහොන් ගැබෙහි දොරටුවෙහි මෙසේ දක්නට ලැබෙනවා.

හිරු නැගීමට පලමු, ඊලඟ හිමිදිරියේ හිස හා මුලු ගතම වසාගත් රජ දේවිය වියලි සුලඟ මැදින් මාලිගාවෙන් නික්මෙනු මහලු පූජකයා බලා උන්නේ වේදනාවෙන්. ඔහු යැවූ ලිපියට පිලිතුරු ලෙස මග එමින් සිටි කුමරා සතුරන් අතින් මියගියබවක්, ඔහුවත්, ඈවත් ඒ වෙලාවේ දැන හිටියේ නෑ.

ඈ පාරාවන් තිදෙනෙකුගේ අනුශාසක ලෙස කටයුතු කල, බලවත් පූජකයකුවූ, තුතන්කාමන්ගෙන් පසු, සිහසුනට පත්වෙන, 'අය්' නමැති තැනැත්තාගේ බිසවුන්ගෙන් එකියක වූ බව සඳහන් වෙනවා. එහෙත් අග බිසව හැටියට නෙමේ. තවත් කතාවක් ලෙස කියවෙන්නේ ඇගේ මව් පාර්ශවයේ මුත්තෙකුගේ බිරියවූ වගයි.

ඉන්පසු ඈ ගැන යමක් ඉතිහාසයේ සඳහන් වෙන්නේ නෑ.

ඇය: අන්කෙසෙනාමුන් (ඊජීප්තුවේ පාරවන්ගේ, දහ අටවෙනි  රජ පරපුරේ, රජෙකු වන අකෙනේතන් රජු හා රූපය සඳහා ප්‍රසිද්ධවූ, නෙෆෙර්ටිටි රැජනගේ දියණිය )

(අන්කෙසෙනාමුන්)

(නෙෆර්ටිටි ගේ චිත්‍රයක්)

ඔහු:  තුතන්කාමන් (ඇයගේ පියා, අකෙනේතන් රජු සහ ඔහුගේම, සොහොයුරියකගෙන් ලද  පුත්‍රයා)...ලෝක ප්‍රසිද්ධ 'ලදරු රජ'

(තූතන් කාමන්ගේ දේහයේවූ මුහුණු වැස්මේ ආධාරයෙන් සැකසුනු පිලිමයකි.

 ස්තානය: කාර්නවන් ආදිපාදවරයාගේ එංගලන්තයේ ගම්බද නිවෙස

දිනය: 1923 වසරේ අප්‍රේල් මාසේ 23 දින රාත්‍රි කාලය

ශීත සෘතුව ඉක්ම ගිය මුත්, මෙතරම ඇට මිදුලු හිරි වට්ටවන තරමේ  සීතලක් දැනෙන්නේ මක් නිසාද? කුණාටුවක් ලංවී වත්ද? වටපිටාව මෙතරම් නිශ්ශබ්ද ඇයි? නිවසේ පිටුපසින් සේවකයන්ගේ හඬක් නෑසෙන්නේ ඔවුන් නිදි නිසා වෙන්නට ඇති. උරිස් වටාවු, වුලන් සාලුව සකස් කරගත් කාර්නවන් ආර්යාව,  හවස් වරුවේ දල්වන ලද ගිණි උදුන අසලින් හිඳ ගත්තේ, නොසන්සුන් සිතකින්. ඇගේ සැමියා ඊජිප්තුවේ පටන් ගන්නා ලද ව්‍යපෘතියට ඇගේ කිසිදු කැමැත්තක් වූයේ නෑ. නොදන්නා මිනිසුන් සිටින, වෙනස්මවූ පරිසරයක් ඔවුන් මේ කරන්නට තන්නේ කුමක්ද? ඔහු යෑමට පෙර ඔහුව යෝගියෙකු කරා ගෙන ගිය අන්දම ඇය සිහිපත් කලා. යෝගියා කුමක්දෝ ලියු කොල කැබැල්ලක් සැමියා අතට දුන් අන්දමත්, ඔහුගේ මුහුන සුදුමැලිව ගිය අයුරුත් ඈ දුටුවා. ඒත් ඔහු කීවේ තමාට පොඩි වෙහෙසක් දැනුණු නිසා එසේ වූ බවයි.

'රජවරුන්ගේ මිටියාවත' විස්මිත කාර්යකටම ඔබින ගුප්ත නමක්....ඔවුන් සොයන්නට හදන්නේ ඈත අතීතයේ මියගිය අයගේ සදාකාලික නින්දට බාධා කිරීමට නේද?

තමා ඒ අවස්තාවේ ඒ ගැන මීට වඩා සොයා නොබැලුවේ මන්ද?

එක්වරම අඳුර මැදින් ඇසුණු ඇඟ කිලිපොලා යන ශබ්දයකින් ඈ තැතිගත්තා. ඒ ඇගේ සැමියාගේ සුරතල් සුනඛයා. ඒ හඬේ වූයේ දුක්මුසු, හද පසාරු කරගෙන යන, ස්වරයක්. ජේම්ස් පැමිණ සතා අස්වසන හඬ ඊලඟට ඇය අසා සිටියා.

ඈ සැමියාගේ කාර්යාල කාමරයට ඇදුනේ ඉවෙන් වගේ. අර කොල කැබැල්ල තාමත් ඔහු සතුව ඇතිද? ඈ ඔහුගේ මේස් ලාච්චු ඇද බැලුවා. දෙකට , තුනට නවා දමන ලද ඒ කරදාසිය එහි තබා තිබුනේ හරියට ඇගේ අතට අසුවෙන්නට වගේ. ඈ සැලෙන දෑතින් එය දිග හැරියා.

'සොහොන් ගැබට ඇතුල් නොවන්න. අණ නොපිලිපදින්නවුන් අනතුරේ. ඔවුන් රෝගවලින් පීඩා විඳිනවා වගේම ඔවුන්ට ඉන් ගැලවීමක්ද නෑ. ඊජීප්තුවේදී ඔවුන් මියයනවා ඇති.’

ඇගේ කෙඳිරිලි හඬ නැවත පටන් ගත් සුනඛයාගේ හඬ හා මුසු උනා.

තූතන්කාමන්ගේ සොහොන විවර කොට 47දිනේදී , කාර්නවන් ආදිපාදවරයා, ඉතා වේදනාකාරී ලෙස මියගියා. ඔහුගේ කම්මුලකවූ, මදුරුවකු දෂ්ට කල ස්තානය රැවුල කැපීමේදී තුවාලවීම නිසා, රෝගීවීමෙන් මිය ගිය බව සඳහන් වෙනවා. ඔහුගේ සුරතලා එදා රෑ මුලුල්ලේ උඩු බුරලමින් සිට පාන්දර මියයනවා. දින දෙකකට පසු, තූතන්කාමන්ගේ දේහය පරීක්ෂා කිරීමේදී, දේහයේ,  කාර්නවන් ආදිපාදවරයාගේ තුවාලය සිදුවූ වම් කම්මුලෙහිම, තුවාල කැලලක් සොයාගනු ලබනවා.

මින් ටික දිනකට පසු ගවේෂනයේ ප්‍රධාන පුරාවිද්‍යඥයකුවු ආතර් මේස් තමා හිඳි හෝටලයේදීම තමන්ට ඉතා මහන්සි බව පවසා සිහිමූර්ජාවී  මිය යනවා.

කාර්නවන් ආදිපාදවරයාගේ ලඟම හිතවතකුවු ජොර්ජ් ගෝල්ඩ් තුතන්කාමන් සොහොන නැරඹීමෙන් ඉක්බිතිව තද උණක් සෑදී පැය 12කින් මියයනවා.

තූතන්කාමන්ගේ දේහයේ එක්ස්‍රේ ජායාරූප  ගත්  රීඩ් තදබල මහන්සිය නිසා එංගලන්තය බලා යන්නේ , එහි ගිය වහාම මියයනවා.

 කාර්නවන් ආදිපාදවරයාගේ පුද්ගලික ලේකම් රිචඩ් නිදි ඇඳේදීම හෘදයාබාධයකින් මියයන්නේ මාස හතරකට පසුව.

බ්‍රිත්‍යාන ව්‍යපාරිකයකුවු ජෝල් වූල් මෙම සොහොන නැරඹීමෙන් මාස කිහිපයකට පසු තද උණක් සෑදී මියයනවා.

මේ කාලය තුල, කාර්නවන් ආදිපාදවරයාගේ ඥාති සොහොයුරා සිය දිවි නසාගන්නවා. මේ ආකාරයෙන් මේ ව්‍යපෘතියට සම්බන්ධවූ 12 දෙනෙක් හය වසරක් තුල මියගියේ තූතන්කාමන්ගේ නින්දට බාධා කිරීමෙන් ලැබු ශාපය නිසා බවට මත රැසක් තිබෙනවා. විද්‍යාවටවත්, වෛද්‍ය විද්‍යාවටවත් මීට හේතු සොයා ගත නොහැකිව තිබෙනවා.

ලොව අප නොදන්නා සියලු දෑ දෙසම වපර ඇසින් බැලීම කලයුතු දැයි සිතෙන්නේ මෙවැනි කතා තවමත් අප අතර පවතින නිසා.

“Love can be a terrible curse. It can make you overlook even the largest flaws in a person's behavior.”