පිට සක්වළින් මෙහි එන "ජාදු"ලා...!!!

රෑවෙනකොට පාරේ වැඩියෙන්ම දකින්ට තියෙන්නේ දුරපලාත්වලට යන බර වාහන. නගරයකට කිට්ටුවෙනකොට ඇරෙන්ට, වෙන කොහෙවත් පාර අයිනේ, දල්වපු වීදි ලාම්පු දකින්ටත් නෑ. අධිවේගී මාවත් තියෙන්නේ ජනශූන්‍ය මිටියාවත්, තැනිතලා මැද්දෙන්. රාත්‍රී රථ ධාවනය සිදු වෙන්නේ වෙන කොහේ හරි ලෝකයක , කියලා වැඩියෙන් දැනෙන්නේ ඒ හන්දා වෙන්ට ඇති. සමහර විට ඒ පහත් තැනිතලා, මීදුමෙන් වැහිලා. හඳ ඇති රැයක නම් , කිරි වතුරෙන් පරිසරය නෑවිලා. අලෝකමත් විදුලි පහනක්,  නිවසින් බැහැර දල්වලා වගේ. සීතල දවසක නම්, රියේ හීටරයෙන් එන උණුසුමට දෑස යාන්තමට පියවෙනවා වගේ. හිත මෝහනය කරන සංගීත නාදයෙන් සිද්ධවෙන්නේ ඒක වැඩිවෙන එක. රිය පැදවීම පොඩ්ඩිගේ නම් කලබල වුනු හිත සංසුන් කරන්නක්. භාවනාවකට සම වැදුනා වගේ.

සමහර වෙලාවට, අකුණු ගසමින් තද වැස්ස වහින්නේ, පාර වැහෙන්ට වැහි වතුර පුරවමින්. තවත් සමහරක් වෙලාවට,  පරිසරය ලා මීදුමකින් බොඳවෙලා යන්නේ, නිල් පාට එලියකින් අපේ ලෝකය අද්භූතව පෙන්වමින්……..හරියටම මෙන්න මේ වගේ වෙලාවක තමා හොලිවුඩ්, බොලිවුඩ් සිනමා සිතුවම්වල “පිට සක්වල ජීවීන්” ගොඩ බහින්නේ. 'කොයි මිල් ගයා ' චිත්‍රපටියේ රෝහිත්ගේ දෙමව්පියන් රිය පදවගෙන ගිහින්, පියාඹන පීරිසියක් දැකලා අනතුරකට භාජනය වෙලා, පියා මියයන්නේ. ඒ හන්දම තමයි රෝහිත්ගේ මොලේ වැඩෙන්නේ නැතුව පොඩි ලමයෙක් වගේ හැසිරෙන්නේ. ඊට පස්සේ එන පිටසක්වල අයෙක්ගෙන් (ජාදූ) අමුතු ශක්තියක් ලබන ඔහු දක්ෂ මිනිසෙක් වෙන්නෙත්. හැබෑට මේ වෙලාවේ පිටසක්වලින් කෙනෙක් ආවොත් මොනවා නම් සිදුවෙයිද? පොඩ්ඩි නම් ඉල්ලුවොත් එයාලගෙන් ඉල්ලන්නේ, රෝහිත්ට වගේ එක, එක්කෙනාට ගුටි අනින්ට කාය ශක්තිය නෙමේ. අනුන්ගේ  හිත් දැනගන්න ශක්තිය. එතකොට සමහර කමෙන්ට්ස් වරදවා තේරුම් ගන්න ඔය අය්යලා, මාමලාගේ එහෙම හිත් කියවලා එයාලා සැනසෙන කමෙන්ට් දාන්ට බැරියැ.

ඒ ගැන මේ ලෝකේ දෙයක් විශ්වාස නොකරන, ඒත් ඒ පිලිබඳ ලිපි ලියන කට්ටිය, මතක් වෙලා පොඩ්ඩිගේ කට කොනක හිනාවකුත් ඇඳුනා. සමහරු ඉපදිලා තියෙන්නේ කිසිවක් විශ්වාස නොකරන්ට. සමහරු ඉපදිලා තියෙන්නේ අනුන්හට ඒ විශ්වාසය තහවුරු කරදීමට.

ඔය කියන විදියේම පියාඹන පීරිසියක් දැකපු දෙන්නෙක් තමයි, බෙටී කෑශ් සහ විකී ලැන්ඩ්‍රම් කියන මැදිවියේ ඇමරිකානු කාන්තාවන් දෙන්නා. සිද්ධිය සිදුවෙලා තියෙන්නේ, ටෙක්සාස් ප්‍රාන්තයේ පාලු කතරක, රිය පදවමින් ඉන්න අවස්තාවකලු. එයාලා දැකලා තියෙන්නේ දියමන්තියක හැඩය ගත්තු දීප්තිමත් වස්තුවක්, අහසේ ඉතා පහලින් ඔවුන් දෙසට එන විදියයි. ඒ සිද්ධිය දුටු විකීගේ හත් හැවිරිදි මුණුබුරා කෑගහද්දි, බෙටී බැහැලා ඒ අසිරිමත් දර්ශනය නැරඹුවලු. එයා කියන විදියට , ඉන් නිකුත් වුනු තාප තරංග  ඉවසන්ට බැරි තරම් කියලා තමයි බෙටී පවසලා තිබුනේ. ප්‍රශ්නය වුනේ මේ තිදෙනාම පසුව රෝගීවූ නිසයි. ඔවුන්ගේ සමේ , හිස්කබලේ පවා, බුබුලු ඇවිත් ඒවා පුපුරලා තුවාලවෙලා තියනවා. බෙටී වමනය, පාචනය වගේ දේවලිනුත් පෙලුනා වගේම එයාගේ ඇස් ඉදිමිලා , අන්ධ භාවයට පත් වෙලා තියනවා. පසුව කෙස් පවා වැටෙන්ට පටන්ගෙන. අන්තිමට හොයා ගත නොහැකි රෝගී තත්වයකින් ඈ මියගිහින්.

පියාඹන පීරිසියක්?

කොහොමද ජාදු කෙනෙක් එලියට බැහැලා කාරෙකට ගොඩ උනානම් එහෙම.

පිටසක්වල ජීවීන් ආවොත් මුලින්ම එයාලගේ  මේ වාහනවලින් බේරෙන එක ගැන තමයි මුලින්ම හිතන්ට වෙන්නේ.

ප්‍රථමවරට පිටසක්වල ජීවීන් ඇහැට දැක්කායයි කියන සිද්ධියක් වාර්තා වෙන්නේ 1949 නිව් මෙක්සිකෝ ප්‍රාන්තයේ රොස්වෙල් කියන පෙදෙසේ. කතාව ඇරඹෙන්නේ, 1947 ජූලි මාසේ, එක් දිනක, දීසියක හැඩය ගත්තු, යම් වස්තුවක් ඇ.එ.ජනපදයේ නිරිත දිග පෙදෙසේ දකින්නට ලැබුනා කියපු කතාවත් එක්ක. ඊලඟ දවසේ ගොවියෙක් එයාගේ පුතත් එක්ක එයාගේ ගොවිපලට යනකොට අනතුරකට ලක්වුනු සුන්බුන් ගොඩක් දැකලා. ඒ මොකක්ද කියලා හිතාගන්ට බැරි උනු ගොවියා පොලිස් නිලධාරීන්ට කතා කිරීමත් සමග එතනත පැමිණ තිබෙන්නේ යුද හමුදා සෙබලුන් සමග වෙනත් කණ්ඩායමක්. ප්‍රචාරය උනේ අනතුරට ලක්වී තිබෙන්නේ ඇමරිකානු ගුවන් හමුදාවට අයිත් අලුත්ම, කාලගුන බැලූනයක් කියලලු. අහිංසක ගොවියා මොනා උනාද දන්නෙත් නෑ පොලිස් අත් අඩංගුවේ සුමානයක් ගත කරන්ටත් සිදුවෙලා.

ඊලඟටත් මේ වගේම සිද්ධියක් වෙනවා 1949දී. එහිදී නම් අනතුරින් මියගිය පිට සක්වල ජීවීන් හයදෙනෙකු මුණු ගැහුනු බවක් කියනවා. ඔන්න එයාලා නම් ජාදූ වගේමයි. (මතක ඇතිනේ අර නිල්පාටට හුරු සමක් තියන , හුරුබුහුටි සත්වයා. ගෝනියක දාලා, කරේ තියාගෙන එලියට අරන් ගියාම සිංදු කියන්නේ.) ඉතින් මේ සත්වයොත් එයා වගේම, අඩි හතරක් පමන උස ඇති, අලු පැහැති සුමට සමක් තියෙන, මිනිස් මුහුනුවරට සමානකම් ඇති, බළල් ඇස් තියෙන කොටසක්ලු. ඉතින් මේ සිද්දිය එලියට ආවේ එයාලට අවශ්‍ය මිනී පෙට්ටි ගන්ට සාප්පුවකට කතා කල වෙලාවේ ඒ අයිතිකාරයා එහි ගිය වෙලාවෙලු. යුද හමුදා ඒකකයකට ගිය ඔහුව, එතනින් එලවගෙන තියනවා...කඩියන් වගේ, කඩි කුල්ලප්පුවෙන් වැඩ කරපු කොටසක් තමයි ඔහු දැකලා තියෙන්නේ. එක හෙදියක් පැවසූ ආකාරයට, ඒ මියගිය ජීවීන්ගේ හදවත් ටී අකුරක හැඩයට කපලා ඉන් එක අවයවක් පමනක් එලියට ගත් බව මේ හෙදිය පවසලා තියෙනවා. මේ විස්තර එලියට දැමීමේ වරද නිසා, එයා වැඩ කරන තැනින් මාරු කලා මදිවට, ඈ ගමන් කල ගුවන් යානය අන්තුරකට භාජනය වෙලා ඈ මිය ගිහින් තියනවා.

රොස්වෙල් ප්‍රදේශයෙන් සොයාගත්බව කියැවෙන, මියගිය පිටසක්වල ජීවියෙකුගේ සිරුරක්...

මේ වගේ ජීවින් කවුරු හරි දැක්කොත් ඇමරිකන් කාරයින්ට නම් ඒ පිලිබඳ කිසිම දෙයක් නොකියන්ට වග බලා ගන්න එක වැදගත්.

මීට අමතරව මෙම පිටසක්වල ජීවීන් උතුරු ඇමරිකාව, ඔස්ට්‍රේලියාව, දකුනු ඇමරිකාව වගේ රටවල සතුන් පැහැරගෙන ගොස් ඔවුන්ගේ අවයව ගත්තට පස්සේ , මලකුනු ආපහු දැමීමේ සිද්ධි වාර්ථා වෙනවා 1967 දී විතර. මේ සිද්ධි වාර්ථා කරන ගොවියන් පවසන්නේ, හිටපු ගමන් අතුරුදහන් වෙන හරක්, එලු, අශ්ව වගේ සතුන්ගේ හිස් සිරුරු ලේ බිඳුවකුදු නැතිව ආපසු පොලොව මතට දමා ගොස් තිබූ බවයි.

මේ ජාදුලා පෘථිවියට එන්නේ මොන හේතුවක් උඩද, මොන පරීක්ෂන පවත්වන්ටද කියලා මේකෙන්ම යන්තමට හිතා ගත්ත හැකි නේද?

කවදා හරි පිට සක්වලින් එන, සිංහලෙන් කීවොත්, පියාඹන පීරිසියක් දැකලා ඒ ගැන පර්යේෂණ කරපු, රොබට් ලසාර් නමැති විද්‍යඥයෙක්, තමන් දැකපු යානාව ගැන මෙන්න මෙහෙම කියලා තියනවා. ඇමරිකා එකසත් ජනපදයේ Area 51 නමින් හඳුන්වන, අධි රහස් පර්යේෂණ කරගෙන යන  ස්තානයේ, S4 කියන තැන  තමා මොහු වැඩ කරලා තියෙන්නේ. ඔහුට අනුව මේ ස්තානයේ ආරක්ෂාව හරිම තදයි. හුස්ම ගන්ටත් බැරි තරම්. කා එක්කවත් සාකච්ජා කිරීමේ නිදහසක්වත් තිබිලා නෑ.

ඔහුට අනුව මෙන්න පියාඹන පීරිසියක ලක්ෂණ...

"එය හරියට පීරිසි දෙකක් එකිනෙක මත මුනින් නවා තිබෙන ගතියක් පෙන්වනවා. උඩින් මොල්ලියක් වැනි දෙයක් නෙරලා තියනවා. ලෝහමය පෙනීමක් ඇති යානයේ පියාපත්, වරල් කිසිවක් නෑ. ඒකට ඇතුල් උනාම ආසන තුනක් පේනවා. මධ්‍යම ප්‍රති ක්‍රියාකාරකය හා ඉන් නික්මිලා සීලිම දක්වා විහිදෙන තරංග නියාමකය, ඒ වගේම ඒ වටාවූ, ගුරුත්ව වර්ධක තුන. (the central reactor and wave guide that goes up to the ceiling, the three gravity amplifiers surrounding it). මීට අමතරව, වෙන කිසිවක් දකින්ට ලැබෙන්නේ නැහැ. විදුලි යතුරු හෝ ඒවායින් විහිදෙන වයර් දකින්ටත් නෑ. අප දන්නා විදියේ පාලක පුවරුවකුත් නෑ. යානය ඇතුලේ ඇති ආසන හා අන් සියලු දේම හරියට ඉටියෙන් කැපුවාක් වැනිව සුමට ලෝහයෙන් නිමවූවක්.  කොතනකවත් තියුණු දාර හෝ මුලු දකින්ට නැහැ. මේ හැමදේම එකම ආකාරයට පිව්ටර් (pewter) ලෝහයේ අඳුරු අලු පැහැයට හුරුයි. මේ යානයට ඇතුලුවීම වැඩිහිටියකුට අසීරු දෙයක්. යානාව ඇතුලත ආසන පවා හරියට පෙනුනේ පොඩි ලමුන් වෙනුවන් හදපු ඒවා වගේ."

ඔහුට කිරීමට සිදුව තිබුනේ මෙහි ප්‍රචාලන පද්ධතිය (propulsion systems)  අධ්‍යයනය කරලා, ඒක හදන්ට යොදාගත්ත අමුද්‍රව්‍ය හා මුලධර්ම ප්‍රතිනිර්මාණය කිරීමයි. ඔහුගේ කාර්ය දුෂ්කර උනේ ඒ සඳහා උපයෝගී කරගත් තාක්ෂණය පෘථිවිය මත නොපවතින, තවත් සෑහෙන කාලයකට අපිට ලඟාවෙන්ටවත් බැරි අන්දමේ තාක්ෂණයක්. එමෙන්ම උපයෝගී කරගත් මුලද්‍රව්‍ය, අපට තවමත් හොයාගත නොහැකිවූ, සුපිරි-බැර මුලද්‍රව්‍යයක් වීම.

මේ ගැන කියවන්ට ගිහින් හම්බ උනු ගොඩක් දේවලින් මතක තිබුනු ටිකක් තමා ඔය.

දැන් මතුවෙන ප්‍රශ්නවලින් කීපයක් මේ....

ඇමෙරිකාව ඇත්තටම මේ වගේ පිටසක්වලින් ආපු යානයක් හොයාගත්තද?

එයාලා මුලු ලෝකෙම අල්ලගන අදහසින් මෙවැනි යානාවක් නිපදන්වන්ට හදනවද?

දැනටමත් හදලද?

ඇත්තෙන්ම පිටසක්වලින් අපිට තර්ජන ඒමට පුලුවන්ද?

ඒ නිසා මිනිසුන් බිය නොකර මෙවැනි කාර්යක් ඔවුන් රහසිගතව කරගෙන යනවාද?

ඇත්තෙන්ම පිටසක්වල ජීවීන් මෙහි පැමිණියාද?

මෙතරම් මිනිසුන් රැසක් බොරු කීවාවත්ද?

කොහොම හරි මේ ගැන හිතමින් ගිය හන්දා, එදා පොඩ්ඩි ගෙදර යන්ට ගන්ට තිබුනු  exit එක මග හැරිලා ගොඩක් දුර ගිහින් ආපහු හරවගෙන තමා ආවේ. ඒ මදිවට අම්මගෙන් හොඳ බැනුමකුත් ඇහැව්වා. පිට සක්වල ජීවීන් ගැන හිත, හිත ආවා කියලා අම්මට කියන්ටයැ ඉතින්. බැනුම් අහලා නිකං හිටියා.

ප/ලි: ස්තූතිය වෙනදා වගේම 'ඔබට'

“Just as no one can be forced into belief, so no one can be forced into unbelief………….Sigmund Freud”